“Доктор G”

Ҳинд киноси мухлислари Аюшман Кхурана доим бир-бирига ўхшамаган фильмларда суратга тушишни ёқтиришини билишади. Баъзан ҳатто бошқа актёрлар ҳеч қачон рози бўлмайдиган ролларни ҳам ижро этади. 2022 йилда томошабинлар эътиборига ҳавола қилинган “Доктор G”ни ҳам одатий фильмлардан бири деб бўлмаса керак. Аммо у ҳаммага бирдек ёқмаслиги табиий. Баъзи манбаларда жанри комедия деб кўрсатилган бу фильмни шунчаки кулгили фильм сифатида қабул қилиш қийин. Фикрлашга, касб танлови борасидаги қарашларни таҳлил қилиб кўришга ундайдиган жиҳатлари бор, назаримда. Нима бўлганда ҳам, одам ўз ишини виждонан бажариши лозим. Айниқса, шифокорлик – одамлар соғлиғи ва ҳаёти учун масъулият юклайдиган касбга лоқайд қараб бўлмайди.