Хон ва Бхансали фильми бир кунда экранга чиқади

Режиссёр Рохит Шеттининг Шоҳруҳ Хон ва Кажол бирга ўйнаган навбатдаги “Dilwale” фильмининг премьера куни маълум бўлди. Фильм шу йилнинг 18 декабрида экранларга чиқади.

Шеттининг фильми кассада йилнинг энг кутилаётган фильмларидан бири — режиссёр Санжай Лила Бхансалининг “Bajirao Mastani” фильми билан тўқнашади. Бхансали фильмни суратга олишни бошлагандаёқ премьера кунини эълон қилган эди. 

Бир томондан кўпчилик экранда бирга кўришни истаган учлик — Ранвир, Приянка ва Дипика, бошқа томондан севимли жуфтлик — Шоҳруҳ ва Кажолнинг қайтиши. “Dilwale” фильмида Варун Дхаван ва Крити Санон ҳам суратга тушган.

2007 йилда худди шундай воқеа бўлган, Бхансалининг “Saawariya” фильми кассада Шоҳруҳ иштирокидаги “Om Shanti Om” фильми билан тўқнаш келган эди. Натижасини ҳамма билади.

Иккала фильмнинг ҳам бюджети катта. Киночиларнинг биронтаси премьера кунини ўзгартирмаса, мухлислар учун икки фильмдан бирини танлаш қийин кечади.