2016 йилда Салмон, Амир ва Шоҳруҳнинг фильмлари эътибор марказида!

2016 йилда Болливудда катта лойиҳалар тақдимоти бўлиши кутилмоқда. Салмон Хон, Амир Хон, Шоҳруҳ Хон ва Акшай Кумар сингари суперюлдузлар одатдаги образлардан чекинаётгани эса қизиқишни янада оширади. 

Бу йил Болливудда энг кутилаётган йирик бюджетли фильм “Sultan”, “Dangal”, “Raees”, “Fan” ва “Housefull 3” бўлиши кутилмоқда. Таҳлилчиларнинг фикрича, шу бешта фильмга омад ёр бўлади. 62-Миллий киномукофотнинг ҳайъат аъзоси бўладиган кинотанқидчи Ражив Вижайакар 2016 йилнинг йирик фильмлари ҳақидаги фикрини билдирди:

“Бошқа биронта фильм 2016 йилда “Султон” фильмининг кассадаги кўрсаткичларини ортда қолдира олади деб ўйламайман, чунки бу — Ийд байрами, бу — “Yash Raj Films”нинг, қолаверса, Салмон Хоннинг фильми. Бу уйғунлик фильмнинг шов-шув бўлишини таъминлайди деб ўйлайман. Бу яхши фильм бўлади деб ҳисоблайман, чунки Али Аббос Зафар доим яхши кино ишлайди. Бундан ташқари, Салмон Хон ҳозирда қизиқарли сюжети билан фарқ қиладиган фильмларни маъқул кўраётганга ўхшайди”.