Приянка Голливуд фильмида салбий ролни ўйнайди

Приянка Чопранинг Голливуд фильмида суратга тушиши ҳақидаги гап-сўзлар тарқагандан сўнг актриса чиндан ҳам “Baywatch” (“Малибу қутқарувчилари”) фильмида суратга тушишини тасдиқлади. 

“Мен режиссёр билан скайп орқали гаплашдим. Сценарийни менга агентим орқали жўнатишди. Салбий роль эркак киши учун ёзилганди. Режиссёр билан гаплашдим, унга аёл бўлишимга қарамай, салбий ролни ўйнаш ҳақидаги фикрим ёқди. Шунинг учун сценарийга ўзгартиришлар киритилди”, — дейди Приянка.

Приянка ўтган йилнинг сентябридан бери фильм ижодкорлари билан музокара олиб бораётганди. Актриса бу фильмда Дуэйн Жонсон билан бирга суратга тушади. “У ажойиб, — дейди Приянка актёр ҳақида. — У чиндан ҳам кинобизнесни тушунадиганлардан, унга қойил қоламан. Қолаверса, у кинога бутунлай бошқа соҳадан келган, шундай бўлса-да, ҳозир киноюлдуз. У билан танишиш жуда мароқли бўлди”.

Приянка 2016 йилнинг илк икки ой жуда яхши ўтганини, бундан буён ҳам ишга бор куч-қувватини бағишлашга тайёрлигини билдирди.