Салмон Хон “Тезлик-4”да суратга тушади

“Тезлик-4” (“Dhoom-4”) фильмида ёвуз қаҳрамонни Салмон Хон ўйнаши ҳақидаги хабар тасдиқланди. Хоннинг шериги эса Вани Капур бўлади. 

“YRF” компанияси раҳбари ва продюсер Адитья Чопра онлайн порталда Салмоннинг салбий ролни ўйнаши, Вани Капур эса бош аёл қаҳрамон ролига танланганини тасдиқлади. Бундан аввал фильмда Ритик Рошан, “Бахубали” актёри Прабхас, Амитабх Баччан, Шоҳруҳ Хон ўйнаши мумкинлиги ҳақида хабарлар пайдо бўлган эди.

Ҳозирда иккала актёр ҳам — Салмон ва Вани — “YRF” компанияси фильмларида суратга тушмоқда. Салмоннинг “Султон” фильмини суратга олиш ишлари якунига етай деб қолди. 2013 йилда “Ҳақиқий ҳиндча муҳаббат” фильмида илк бор суратга тушган Вани Парижда Адитья Чопранинг режиссёрлик лойиҳаси бўлмиш “Befikre”да Ранвир Сингх билан суратга тушишни бошлади.

Шубҳасиз, бу жуфтлик “Тезлик-4”га бўлган қизиқишни кучайтиради.