Барун Собти: “Мен жуда тортинчоқ йигитман”

— Сизга энг кўп берилган савол?

— Одамлар ҳалигача мендан “Муҳаббат тафти” сериали ҳақида сўрашади.

— Ижро қилишингизга тўғри келган энг ғайриоддий саҳна?

— “Муҳаббат тафти”да йиғлашим керак эди. Бундан роса ташвишланганман ва қийин бўлади деб ўйлаганман, лекин ҳаммаси жуда яхши ўтган.

— Романтик саҳналар-чи?

— Албатта, менга экранда романтик саҳналарни ўйнаш ноқулай бўлган, аммо Санайяга янада қийинроқ бўлганди. Лекин биз уддаладик, умуман, суратга тушиш чоғида кўп ҳазиллашардик. 

— Телевидениеда йўлга қўйиб олган фаолиятингизни Болливуд учун ташлашдан қўрқмадингизми?

— Ҳаётда таваккал қилишни ёқтираман.

— Телевидение ва Болливуддаги энг гўзал актриса?

— Анча ноқулай аҳволга қўядиган савол... Мен бирга ишлаган ҳамма актрисалар — Неха Жанпандитдан тортиб Санайя Ирани ва Далжит Бханотгача — ҳаммаси гўзал деган бўлардим. Болливудда Сонали Бендрени ёқтираман.

— Телевидение актёрларидан ҳозир ким жуда машҳур деб ўйлайсиз?

— Каран Сингх Гровер.  

— Кўп актёрлар кинодаги фаолият учун телевидениедан кетишган: Амар Упандхаяй, Ражив Кханделвал, Прачи Десаи... Кимдир ёриб кира олди, кимдир эса — йўқ. Ўз имкониятларингизни қандай баҳолайсиз?

— Ҳозир мен берадиган ҳар қандай жавоб мени яхши томондан кўрсатмайди: ё пессимист, ё нокамтар одамдек кўринаман. Шунинг учун жавобим — вақт кўрсатади.

— Сиз бирга ишлашни истайдиган Болливуд актрисалари?

— Мен Амир Хон эмасман! Аёллар борасида билмадим-у, лекин Амитабх Баччан билан ишлашни истайман.

— Қайси одатингиздан қутулишни истайсиз?

— Ўзимдан жуда мамнунман. Бенуқсонман демайман, аммо ўзимдан мамнунман.

— Одамлар сизни ҳаддан ташқари манман дейишади...

— Ўша одамлар кимлар? Мен жуда тортинчоқ йигитман.

— Ўзингизни эр сифатида қандай баҳолайсиз?

— Бу ҳақда хотинимдан сўраганингиз маъқул.

— Рафиқангиз билан ота-она бўлишга тайёрмисиз?

— Яқин келажакда деб умид қиламиз.

Севара АЗИЗ тайёрлади.